D‘Lisa wäred ihr wohl alle kenna, dia liebt über alles ihre Henna. Send se noch a weng größer, Lisa‘s Henna, ma kennt‘s jetzt praktisch Teenager nenna, no daffed se endlich henta naus, in ihr super Hennahaus. „Hennahaus“, was sag i au do? Des isch da reinschte Bungalow. Do kenned dia Henna relaxa ond gruaba, des Hühnermobil isch ei‘gricht, so hot vo ui it jeder a Stuba. Und erscht der Hennagata, it nograd a Wies, a‘glegt wia en Park, des reinschte Hühnerparadies. Und mittladren zwisched Henna ond Guhl, stoht da Lisa ihren Liegestuhl. In dem Liegestuhl duat d‘Lisa it bloß regeneriera, noi sie duat au d‘Fengernegel schneida, feila und lackiera. Jetzt hert ma vo da Lisa „Gock gock gogogo“ und scho isch ois vo ihre Hühner do. „Komm Bieberle“, duat se dem flatiera, „i du dir deine Kralla au lackiera!“ Und tatsächlich, ihr wäreds ui it vorstella kenna, sie macht Maniküre bei äll ihre Henna…